រដ្ឋមន្រ្ដីក្រសួងព័ត៌មាន ឯកឧត្តម ខៀវ កាញារីទ្ធ បានបញ្ជាក់យ៉ាងច្បាស់ថា ការហាមឃាត់​មិនឱ្យអ្នកសារព័ត៌មាន​ថតគឺមិនមែនហាមគ្រប់កន្លែងទាំងអស់នោះទេ

ថ្ងៃចេញផ្សាយ ថ្ងៃ​ទី១០ ខែកុម្ភ: ឆ្នាំ២០២១: ខែឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មានបានបញ្ជាក់ថា ការហាមឃាត់​មិនឱ្យអ្នកសារព័ត៌មាន​ថតគឺមិនមែនហាមគ្រប់កន្លែងទាំងអស់នោះទេ ប៉ុន្ដែអ្នកសារ​ព័ត៌​មាន ក៏ត្រូវយល់ដឹងច្បាស់ថា អ្នកសារព័ត៌មានមិនអាចចូលថតបាននៅគ្រប់ទី​កន្លែង​នោះ​ដែរ។ ការគូសបញ្ជាក់របស់ឯកឧត្ដមរដ្ឋមន្រ្ដីក្រសួងព័ត៌មាននេះ បានធ្វើឡើងបន្ទាប់ពី​មាន​ការតវ៉ារបស់សម្ព័ន្ធអ្នកសារព័ត៌មានកម្ពុជា CamboJA និងបណ្តាសមាគមអ្នកកាសែត​មួយចំនួនទាក់ទងទៅនឹងការហាមមិនឱ្យអ្នកសារព័ត៌មាន ចូលថតនៅក្នុងតំបន់សមត្ថ​កិច្ច​ហាមឃាត់ ដែលបញ្ហានេះ ត្រូវបានចោទថា ជាការរារាំងសេរីភាព និងបានចោទបន្ថែម ទៅលើការណែនាំរបស់ស្នងការនគរបាលរាជធានីភ្នំពេញ ដោយយកសំដីរបស់រដ្ឋមន្រ្តី​ក្រសួង​ព័ត៌មាន ដើម្បីអាចចាប់អ្នកសារព័ត៌មាន។ ថ្លែងក្នុងកិច្ចប្រជុំសាមញ្ញប្រចាំសប្តាហ៍របស់ថ្នាក់ដឹកនាំក្រសួងព័ត៌មាន នាព្រឹកថ្ងៃ​ទី០៨ ខែកុម្ភ: ឆ្នាំ២០២១ នៅទីស្ដីការក្រសួងព័ត៌មាន ឯកឧត្តម ខៀវ កាញារីទ្ធ បានធ្វើ​ការឆ្លើយ​តបទៅនឹងការលើកឡើងទាំងនេះថា ដោយសារសមាគមសារព័ត៌មានមួយ​ចំនួន​នោះ មិន​បានយល់អ្វីដែលជាច្បាប់នោះទេ និងអ្វីដែលហៅថាដែនសមត្ថកិច្ចហាមឃាត់ ត្រូវ​បាន​កំណត់ការហាមចូល។ ឯកឧត្ដមបានលើកជាឧទាហរណ៍ជាក់ស្ដែងថា បើនៅ​សហរដ្ឋ​អាមេរិកវិញ នៅពេលដែលហ៊ានចូលក្នុងដែនហាមឃាត់របស់សមត្ថកិច្ច គឺត្រូវ​ចាប់​ដាក់​ខ្នោះតែម្តង។ ឯកឧត្តមរដ្ឋមន្រ្តីបានសង្កត់ធ្ងន់ថា “អ្នកកាសែតមិនមែនធ្វើការ​ជំនួស​សមត្ថ​កិច្ច​នោះទេ គឺត្រូវរង់ចាំនៅពេលគេធ្វើការស្រាវជ្រាវវាយតម្លៃហេតុ​ការណ៍​នោះ ចប់ជាមុនសិន ទើបមានអ្នកនាំពាក្យរបស់អាជ្ញាធរ សមត្ថកិច្ចនោះ ជាអ្នកផ្តល់ព័ត៌ មានឱ្យជាផ្លូវការ”។ ឯកឧត្ដមក៏បានលើកឡើងទៀតថា ក្នុងរយៈពេលកន្លងមកនេះ ឯកឧត្តម ស ថេត ស្នងការ​នគរបាលរាជធានីភ្នំពេញក៏បានបញ្ជាក់ច្បាស់ថា នៅក្នុងពេល សមត្ថកិច្ចកំពុងធ្វើការ​ស៊ើប​អង្កេតរឿងព្រហ្មទណ្ឌ ឬរឿងអ្វីមួយគឺ​មិនអនុញ្ញាត​ឱ្យថតនោះ​ទេ ដើម្បីរក្សាការសម្ងាត់។ ដូច្នេះត្រូវយល់ពីដែនសមត្ថកិច្ច និងយល់ពីភារកិច្ច​របស់អ្នក​សារព័ត៌មាន គឺត្រូវ​មានសិទ្ធិ​ត្រឹមកម្រិតណាដោយមិនត្រូវទៅបំពាន​នៅកន្លែងគេនោះទេ។ ជាមួយគ្នានេះដែរ ឯកឧត្តម ខៀវ កាញារីទ្ធ ក៏បានជំរុញឱ្យថ្នាក់ដឹកនាំគ្រប់ អគ្គ​នាយក​ដ្ឋានទាំង ៥ ចំណុះឱ្យក្រសួងព័ត៌មាន រៀបចំធ្វើបញ្ជីឈ្មោះមន្រ្តីអាទិភាព ពិសេស​សម្រាប់អ្នកដែលចេញទៅយកព័ត៌មាន និងធ្វើកិច្ច​សម្ភាសន៍ជាប្រចាំ ដើម្បីទទួលបានការ​ចាក់វ៉ាក់សាំងប្រឆាំងជំងឺកូវីដ១៩ ពីក្រសួងសុខា​ភិ​បាល  ហើយវ៉ាក់សាំង Sinopharm របស់ប្រទេស​ចិននេះ គឺចាក់បានតែអ្នកមានអាយុចាប់ពី១៨ ឆ្នាំ រហូត​ដល់ ៥៩ ឆ្នាំ តែ ប៉ុណ្ណោះ។ សូមអរគុណ!